A Federación Galega de Automobilismo porá en marcha unha xornada de verificación voluntaria dos vehículos participantes no Campionato Xunta de Galicia de Montaña, de cara a que todos os equipos cheguen a primeira cita puntuable, a Subida a Taboada, nas mellores condicións posibles.
Esta xornada de verificación voluntaria terá lugar na explanada do Centro Comercial Pontiñas de Lalín, dende as 10:00 horas da mañá do sábado 13 de abril.
Para poder realizar a verificación previa, os equipos deberán acudir co Performance Factor (PF) da tempada 2024 cuberto e listo para ser revisado polos técnicos da FGA. Non será válido o PF da pasada tempada.
Ademáis da presenza dos vehículos de montaña tamén poderán acudir os participantes dos outros certames galegos e así consultar calquera dúbida que teñan sobre a preparación ou seguridade dos seus vehículos de competición.