O Campionato Xunta de Galicia de Autocross chegou a súa fin esta fin de semana coa celebración da séptima e última proba do certame, o Autocross de O Castro.
O bo tempo en Galicia axudou a que un bo número de afeccionados se deran cita no circuito de Taragoña para despedir unha tempada apaixoante nas catro categoría puntuables.
Entre os carcross júnior, primeira posición na final para Lolo Bermúdez, que aos mandos do Life Live superou en catro segundos a Joao Traila e en nove a Andrés Iglesias.
Na MRF Júnior, primeira posición para o becado da Federación Galega de Automobilismo, Xaquín Corba. Aarón Ruiz e Adrián Fernández foron segundo e terceiro, respectivamente.
Na Clase I, triunfo para Alejandro Vecino, no Citroën Saxo. O segundo chanzo do podio foi para Javier Lea e o terceiro para Rubén Álvarez, todos eles en vehículos da marca do doble chevrón.
Un chanzo por riba, na Clase II, primeiro posto para Jon Ander López con Martín Castro xusto a continuación nunha fermosísima carreira. A terceira praza foi para Daniel Castro.
Por último, entre os Carcross e co título por decidir, victoria e cetro autonómico para Diego García no LifeLive. O segundo posto foi a parar a mans de Sergio Suárez e o terceiro, nunha boa remontada na final, para Darío Calviño.
Sergio Busto foi o mellor entre os participantes na MRF Senior, seguido de Manuel Martins e Daniel Rey.