A Federación Galega de Automobilismo continúa a traballar no que será a reformulación do Volante FGA na tempada 2026.
Tal e coma se anunciara anteriormente, os Dacia Sandero Eco Cup pasarán a ser o vehículo deste certame, que pasará a chamarse Volante FGA – Sandero Eco Cup Galicia 2026. Desta forma, a FGA continuará a procurar novos talentos neste formato promocional, que se transforma en monomarca por primeira vez na súa xa longa historia.
Conscientes da importancia de apoiar aos deportistas na súa formación e tamén no futuro, o Volante FGA terá 10.000 euros máis en premios durante a tempada, importe que se repartirá nas cinco probas puntuables do certame. Así pois os premios para a tempada pasarán de 13.000 a 23.000 euros. Ademáis, nesta tempada 2026 o pago dos premios correrá por conta da FGA, axilizando así o proceso para os equipos.
Da mesma forma, a beca do Volante FGA permanecerá en 2027, co Renault Clio Rally5 coma vehículo de referencia tal e coma sucedeu en tempadas anteriores.
Nos próximos días publicarase o reparto de premios, o calendario e as novidades do novo Volante FGA – Sandero Eco Cup Galicia 2026.