Despois de varios meses de intenso traballo a Copa Aygo Galicia 2027 xa é unha realidade. Esta nova competición monomarca nace co obxectivo de ofrecer aos pilotos galegos un formato accesible, igualado e cunha importante bolsa de premios económicos.
A Copa Aygo Galicia 2027 disputarase ao longo de 6 probas puntuais integradas no calendario autonómico. Para optar á clasificación xeral final, os equipos deberán completar un mínimo de 4 probas, permitíndose ademais 1 descarte do peor resultado obtido ao longo da tempada.
Este formato promocional monomarca non puntuará dentro do Criterium Recalvi.
O calendario provisional estará composto polos seguintes rallyes:
-
Rally do Cocido
-
Rally de Noia / Rally de Ferrol (pendente de confirmación definitiva)
-
Rally de Pontevedra
-
Rally Sur do Condado
-
Rally Comarca de Carballiño
-
Rally San Froilán
A organización repartirá 17.000 euros en premios ao longo da tempada. En cada unha das 6 probas, a contía distribuirase da seguinte maneira:
| Posición | Premio Económico |
| 1º Clasificado | 1.400 € |
| 2º Clasificado | 700 € |
| 3º Clasificado | 500 € |
| 4º Clasificado | 200 € |
Ademais dos premios por carreira, haberá un premio final de tempada que se anunciará proximamente no regulamento oficial.
No apartado técnico, AMF Motorsport será o subministrador oficial dos pneumáticos semi-slick da marca Yokohama, garantindo así a igualdade de condicións para todos os participantes.
O certame conta co patrocinio e apoio de Grupo Breogán, Sorrybut, Igar Construccións e a Federación Galega de Automobilismo (FGA).